ខណ្ឌរដ្ឋបាលជលផលក្រចេះ សហការជាមួយគណៈបញ្ជាការឯកភាពស្រុក ក្រុមប្រឹក្សាឃុំប្ញស្សីកែវ ចុះបង្ក្រាបបទល្មើសជលផលនៅចំណុចបឹងវែង
(ខេត្តក្រចេះ)៖ ថ្ងៃអាទិត្យ ១១កើត ខែមិគសិរ ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី០៤ ខែធ្នូ ឆ្នាំ២០២២ ខណ្ឌរដ្ឋបាលជលផលក្រចេះ សហការជាមួយគណៈបញ្ជាការឯកភាពស្រុក ក្រុមប្រឹក្សាឃុំប្ញស្សីកែវ ចុះបង្ក្រាបបទល្មើសជលផលនៅចំណុចបឹងវែង ឃុំប្ញស្សីកែវ ស្រុកព្រែកប្រសព្វខេត្តក្រចេះ។
លោក ម៉ុក ពន្លក នាយខណ្ឌរដ្ឋបាលជលផល បានឱ្យដឹងថា ក្រុមការងារប្រចាំការអនុវត្តបទបញ្ជាទប់ស្កាត់ និងបង្ក្រាបបទល្មើសនេសាទ ឈរជើងនៅចំណុចបឹងវែង ឃុំប្ញស្សីកែវ ស្រុកព្រែកប្រសព្វ ខេត្តក្រចេះ បានចុះរុះរើកាប់បំផ្លាញចោលឧបករណ៍នេសាទដូចជា៖ របាំងព្រួលសាច់អួននីឡុងក្រលាញឹក(៥ម.ម)ចំនួន៨ខ្សែ ប្រវែង៥០០ម លបសាច់អួនក្រលាញឹក(៥ម.ម) ចំនួន១០គ្រឿង
របាំងស្បៃមុងចំនួន៣ខ្សែ ប្រវែង២៤០ម លូស្បៃមុងចំនួន០៣គ្រឿង បង្គោលចម្រឹងប្ញស្សីចំនួន៩២ដើម និងចាក់លែងត្រីចម្រុះទម្ងន់ប្រមាណ ៤០ គីឡូក្រាម ចូលក្នុងបឹងធម្មជាតិវិញ គីឡូក្រាម។
លោក ម៉ុក ពន្លក បានបន្ថែមថា ការចុះបង្ក្រាបនេះគឺជាការយកចិត្តទុកដាក់ ការថែរក្សានូវធនធានធម្មជាតិ ដោយសារកន្លងមកមានការ នេសាទ ហួស ដែនកំណត់ និងការប្រើប្រាស់លក្ខណៈទ្រង់ទ្រាយធំធ្វើឲ្យការបាត់បង់នូវពូជត្រីមួយចំនួន។
ជាចុងក្រោយលោក ម៉ុក ពន្លក ក៏បានអំពាវនាវដល់ប្រជានេសាទទាំងអស់ មេត្តាជួយទប់ស្កាត់ និងការពារពូជត្រីនៅរដូវទឹកឡើង គឺជារដូវត្រីពង ដើម្បីរក្សាពូជត្រីឲ្យបាន គង់វង្សជានិរន្តន៍ផងដែរ៕
