កម្ពុជានឹងចាក់វ៉ាក់សាំងបង្ការជំងឺកូវីដ-១៩ដូសទី៦
កម្ពុជានឹងចាក់វ៉ាក់សាំងបង្ការជំងឺកូវីដ-១៩ ដូសទី៦ដល់មន្ត្រីរាជការ អាជ្ញាធរជួរមុខនិងប្រជាពលរដ្ឋទូទៅ ដើម្បីពង្រឹងភាពស៊ាំក្នុងសហគមន៍ខណៈដែលជំងឺរាតត្បាតនៅតែកើតមាននៅលើពិភពលោក រួមទាំងប្រទេសកម្ពុជា។ការប្រកាសនេះធ្វើឡើងដោយសម្តេចនាយករដ្ឋមន្ត្រី ហ៊ុន សែនក្នុងសារសំឡេងពិសេសដែលបានចែករំលែកកាលពីល្ងាចម្សិលមិញ។ក្រៅពីនេះ សម្តេចបានបន្តថា កុមារអាយុពី ៣ ទៅក្រោម ៥ឆ្នាំ នឹងទទួលបានការចាក់វ៉ាក់សាំងដូសទី៤ ខណៈក្មេងអាយុពី៥ ឆ្នាំដល់ក្រោម ១២ ឆ្នាំនឹងទទួលបានការចាក់ដូសទី ៥។សម្តេចនាយករដ្ឋមន្ត្រីបានគូសបញ្ជាក់យ៉ាងដូច្នេះថា“នេះគឺដើម្បីធានាសុវត្ថិភាព និងសុខភាពរបស់ប្រជាពលរដ្ឋយើង”។
“វ៉ាក់សាំងគឺជាជម្រើសតែមួយគត់ដើម្បីជួយយើងកាត់បន្ថយហានិភ័យនៃការឆ្លងនិងភាពធ្ងន់ធ្ងរនៃជំងឺ”។
សម្តេចនាយករដ្ឋមន្ត្រីបានបន្ថែមថាសម្តេចបានឯកភាពលើគោលការណ៍បន្តចាក់វ៉ាក់សាំងរៀងរាល់៦ខែម្តង បន្ទាប់ពីចាក់ដូសចុងក្រោយនិងបានណែនាំដល់គណៈកម្មការជាតិចំពោះកិច្ចសម្រាប់ការចាក់វ៉ាក់សាំងការពារជំងឺកូវីដ-១៩ ឱ្យដំណើរការតាមផែនការ។សម្តេចហ៊ុន សែន បានបញ្ជាក់ជាថ្មីថា កម្ពុជាមានវ៉ាក់សាំងកូវីដ-១៩ គ្រប់គ្រាន់ហើយ ដោយបានបង្ហាញថា បច្ចុប្បន្ននេះ មានវ៉ាក់សាំងចំនួន ៧លានដូស ក្នុងស្តុកជាតិ ដោយមិនទាន់រាប់បញ្ចូលចំនួន ២០លានផ្សេងទៀត ដែលមិនទាន់មកដល់កម្ពុជានៅឡើយ។ ដូច្នេះ សម្តេចបានអំពាវនាវដល់ជនរួមជាតិសារជាថ្មីឱ្យទៅចាក់វ៉ាក់សាំងដូសជម្រុញ។
យោងតាមរបាយការណ៍របស់គណកម្មាធិការជាតិចំពោះកិច្ចសម្រាប់ការចាក់វ៉ាក់សាំង កូវីដ-១៩ គិតត្រឹមថ្ងៃទី២៨ ខែធ្នូ មានជាង ៩០ ភាគរយនៃប្រជាជនកម្ពុជាសរុបចំនួន ១៦ លាននាក់បានទទួលវ៉ាក់សាំងដូសមូលដ្ឋាន។ មានជាង ១០.៤ លាននាក់បានទទួលការចាក់ដូសទី៣ ខណៈពេលដែលមានប្រហែល ៤.៧ លាន បានទទួលការចាក់ដូសទី៤ និង ១.២ លាននាក់ និងទី៥៕
