• 2022-12-31 08:00:00

ភ្នំពេញ ៖ រាជរដ្ឋាភិបាលកម្ពុជា ក្រោមការដឹកនាំដ៏ឆ្លាតវៃរបស់សម្ដេចតេជោ ហ៊ុន សែន មិនទុកយូរឡើយចំពោះបុគ្គលដែលមានតំណែងធំៗ ប្រើហិង្សាទៅលើស្ត្រីភេទ ឬផ្ទុយពីអនុក្រឹត្យ គឺត្រូវតែដកដំណែងចេញភ្លាមៗ។

ជាក់ស្ដែង កាលពីយប់ចុងឆ្នាំ ថ្ងៃទី២៩ ខែធ្នូ ឆ្នាំ២០២២ លោកអភិបាលរងខេត្តកែប ភូ លិ បានផឹកសុរាយ៉ាងជោគជាំបាត់បង់ស្មារតី រហូតឈានដល់ការបៀតបៀនប្រពន្ធអ្នកដទៃ និងជ្រុលដៃយកកែវស្រាគប់ទៅលើស្ត្រីម្នាក់ បណ្ដាលឲ្យរងរបួសត្រង់ក្បាល ដេររហូតចំនួន ១៦ថ្នេរ។

យោងតាមអនុក្រឹត្យ ស្ដីពីការបញ្ចប់មុខតំណែងមន្ត្រីរាជការ លេខ ១២០២ អ.ន.ក្រ.តត សម្រេច មាត្រា១៖ បញ្ចប់មុខតំណែងលោក ភូ លិ ឋានរស័ក្តិវរមន្ត្រី ថ្នាក់លេខ១ ពីអភិបាលរង នៃគណៈអភិបាលខេត្តកែប។

*មាត្រា២៖ បទប្បញ្ញត្តិទាំងឡាយណាដែលមានខ្លឹមសារផ្ទុយនឹងអនុក្រឹត្យនេះ ត្រូវទុកជានិរាករណ៍។

*មាត្រា៣៖ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រីក្រសួងមហាផ្ទៃ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រដ្ឋមន្រ្តីក្រសួងមុខងារសាធារណៈ រដ្ឋមន្ត្រីគ្រប់ក្រសួង ប្រធានគ្រប់ស្ថាប័នដែលពាក់ព័ន្ធ និងសាម៉ីខ្លួនដូចមានឈោ្មះ ក្នុងមាត្រា១ ខាងលើ ត្រូវទទួលបន្ទុកអនុវត្តអនុក្រឹត្យនេះ ជាភារកិច្ចរៀងៗខ្លួនចាប់ពីថ្ងៃចុះហត្ថលេខាតទៅ។

យោងតាមប្រភពព័ត៌មានបានបង្ហើបឱ្យ More News ដឹងទាំងព្រឹកព្រលឹមថ្ងៃទី៣១ ខែធ្នូនេះថា ក្រុមគ្រួសារសាច់ញាតិរងគ្រោះ បានរៀបចំឯកសារ និងវត្ថុតាង ដើម្បីយកមកសាលាដំបូងខេត្តកែប ដើម្បីដោះស្រាយទៅតាមនីតិវិធីច្បាប់ ជាមួយបុគ្គលខាងលើ ភូ លិ៕