ចិន លួចបង្កប់បណ្ដាញចារកម្ម នៅក្នុងជួរមន្រ្ដីយោធាកោះតៃវ៉ាន់
តៃប៉ិ ៖ ស្របពេលក្រុងប៉េកាំងកំពុងតែបង្កើនសកម្មភាពយោធា នៅច្រកសមុទ្រតៃវ៉ាន់ បង្កឲ្យមានភាពតានតឹងនោះមក ក្រុងតៃប៉ិ បានបង្កើនការស៊ើបអង្កេត និងចាប់ខ្លួនក្រុមមន្រ្ដីយោធារបស់ខ្លួនជាច្រើននាក់ ដោយសារមានការសង័្សយជាចារកម្មលួចបង្កប់របស់ចិន។
សារព័ត៌មានអារ៉ាប់អន្ដរជាតិ Alarabiya News បានចេញផ្សាយកាលពីថ្ងៃព្រហស្បតិ៍ ទី៥ ខែមករា ដោយដកស្រង់ប្រភពពីទីភ្នាក់សារព័ត៌មានពាក់កណ្ដាលផ្លូវការ នៅក្នុងទីក្រុងតៃប៉ិ បានរាយការណ៍ថា តៃវ៉ាន់បានឃុំខ្លួនមន្រ្ដីសកម្មចំនួន៣នាក់ និងមន្រ្ដីកងទ័ពអាកាសចូលនិវត្ដន៍ម្នាក់ ដោយសារមានការសង័្សយថា ពួកគេលួចបង្កប់ធ្វើការងារជាចារកម្ម បម្រើផលប្រយោជន៍ឲ្យប្រទេសចិន។ ការចាប់ខ្លួននេះ នឹងក្លាយជាករណីមួយ បង្ហាញអំពីទំហំលួចលាក់យ៉ាងសម្ងាត់របស់ក្រុងប៉េកាំង នៅលើដែនកោះមួយនេះ។
ប្រព័ន្ធផ្សព្វផ្សាយពាក់កណ្តាលផ្លូវការដដែលនោះ បានអះអាងថា អតីតមន្ត្រីរបស់ក្រុងតៃប៉ិ បានចាកចេញពីអាជីពយោធា នៅក្នុងឆ្នាំ២០១៣ ហើយគាត់បានចាប់ផ្តើមមុខរបរ ធ្វើជំនួញ នៅក្នុងប្រទេសចិន ជាកន្លែងដែលគាត់ត្រូវបានជ្រើសរើស ឱ្យធ្វើជាចារកម្ម ដោយមិនបាននិយាយថា ព័ត៌មាននេះទទួលបានពីណានោះឡើយ។
សារព័ត៌មាន Channel News Asia បានរាយការណ៍កាលពីល្ងាចថ្ងៃពុធថា ក្រុមរដ្ឋអាជ្ញា សង្ស័យថា អតីតមន្រ្ដីរបស់តៃវ៉ាន់រូបនោះ បានជ្រើសរើសមន្ត្រីចំនួន៦នាក់ ហើយបានផ្ដល់ប្រាក់ខែ ចន្លោះពី ២០០ ០០០ដុល្លារតៃវ៉ាន់ ឬស្មើនឹងនឹង ៦ ៥១០ដុល្លារអាមេរិក ទៅ ៧០០ ០០០ដុល្លារតៃវ៉ាន់ ឬស្មើនឹងប្រហែល ២២ ៨០០០ដុល្លារអាមេរិក តាមរយៈក្រុមហ៊ុនសែល។ ជនជាប់ចោទ និងមន្ត្រីចំនួន៣នាក់ផ្សេងទៀត បម្រើការនៅក្នុងកងទ័ពអាកាស និង កងទ័ពជើងទឹក ត្រូវបានឃុំខ្លួន នៅទីក្រុងកាវសៀង (Kaohsiung) នាភាគខាងត្បូង កោះតៃវ៉ាន់។ ចំណែកមន្ត្រីសកម្មចំនួន៣នាក់ផ្សេងទៀត ត្រូវបានដោះលែងឱ្យនៅក្រៅឃុំ។
ទោះជាយ៉ាងណា រហូតមកដល់ពេលនេះ តៃវ៉ាន់ បាននិងកំពុងតែតស៊ូ លុបបំបាត់បណ្ដាញចារកម្មរបស់ចិន លួចបង្កប់នៅក្នុងជួរកងទ័ពរបស់ខ្លួន។ សហរដ្ឋអាមេរិក ជាអ្នកគាំទ្រខាងយោធាដ៏ធំបំផុតរបស់កោះតៃវ៉ាន់ ក៏បានបង្ហាញ អំពីការព្រួយបារម្ភ អស់រយៈពេលជាយូរមកហើយ អំពីសមត្ថភាពយោធារបស់ដែនកោះ គ្រប់គ្រងដោយខ្លួនឯង តាមបែបលទ្ធិប្រជាធិបតេយ្យ នៅក្នុងការថែរក្សាបច្ចេកវិទ្យា និង អាថ៌កំបាំងផ្សេងៗទៀត បញ្ចៀស អំពីការតាមដានផ្នែកចារកម្មរបស់ក្រុងប៉េកាំង។
សារព័ត៌មាន Channel News Asia បានរាយការណ៍កាលពីមុនថា ក្រសួងការពារជាតិតៃវ៉ាន់ធ្លាប់បានលើកឡើង កាលពីខែវិច្ឆិកា ឆ្នាំ២០២២ ថា ការបង្កប់បណ្ដាញចារកម្មរបស់ចិន បានបង្កនូវការគំរាមកំហែងយ៉ាងធ្ងន់ធ្ងរបំផុត ដល់សន្ដិសុខជាតិរបស់ដែនកោះមួយនេះ។ ការអត្ថាធិប្បាយទាំងនេះ បានកើតឡើង ខណៈអាជ្ញាធរបានបើកការស៊ើបអង្កេត ទៅលើមន្ត្រីកងទ័ពជើងគោកម្នាក់ ជុំវិញការចោទប្រកាន់ អំពីការទទួលបានប្រាក់ ចំនួន ៤០ ០០០ដុល្លារតៃវ៉ាន់ក្នុងមួយខែ ពីប្រទេសចិន ដើម្បីប្រមូលការស៊ើបការណ៍សម្ងាត់ និង យល់ព្រមចុះចាញ់ ប្រសិនបើសង្គ្រាមបានផ្ទុះឡើង។ បញ្ហាចារកម្មនេះ កំពុងតែជះឥទ្ធិពលយ៉ាងខ្លាំងបំផុត ដល់កងទ័ពតៃវ៉ាន់។
លោក ចាង ចេភីង (Chang Che-ping) អតីតអនុរដ្ឋមន្រ្ដី ក្រសួងការពារជាតិតៃវ៉ាន់ ធ្លាប់ជាមន្រ្ដីជាន់ខ្ពស់លំដាប់លេខ៣ នៃកោះតៃវ៉ាន់ ត្រូវបានស៊ើបអង្កេត នៅក្នុងឆ្នាំ២០២១ នៅក្នុងអំឡុងពេលមានការព្រួយបារម្ភ អំពីទំនាក់ទំនងជាមួយបណ្ដាញចារកម្មរបស់ចិន។ គាត់បានជម្រះនូវមន្ទិល និង បានក្លាយជាសាក្សី នៅក្នុងសំណុំរឿង ដែលឈានដល់ការចោទប្រកាន់ អំពីបទចារកម្ម កាលពីខែមិថុនា ប្រឆាំងនឹងឧត្តមសេនីយ៍ចូលនិវត្តន៍ និង វរសេនីយ៍ទោម្នាក់។
ក្រុងវ៉ាស៊ីនតោន កំពុងតែបោះជំហានយ៉ាងខ្លាំង គាំទ្រខាងយោធា ដល់កោះតៃវ៉ាន់ ក្រោយពេលក្រុមមន្រ្ដីជាន់ខ្ពស់ យោធាសហរដ្ឋអាមេរិក បានបង្ហាញយ៉ាងច្បាស់ ថា កងទ័ពចិន មានសមត្ថភាព វាយលុក ដណ្ដើមកាន់កាប់កោះតៃវ៉ាន់ នៅក្នុងឆ្នាំ២០២៧ខាងមុខនេះ។ កាលពីឆ្នាំ២០២២កន្លងទៅនេះ តៃវ៉ាន់ បានរកឃើញយន្ដហោះចម្បាំងរបស់ចិន ចំនួន ១ ៧០០គ្រឿង បានហោះរំលោភ ចូលទៅក្នុងតំបន់កំណត់ការពារដែនអាកាសរបស់ខ្លួន និង មាននាវាចម្បាំង ជាង៦៦០គ្រឿង បានរំលោភ ចូលទៅក្នុងដែនទឹករបស់តៃវ៉ាន់។
ស្របពេលមានការបង្ហាញសញ្ញា អំពីការគំរាមកំហែង ដោយយោធារបស់ប្រទេសចិន មកលើតៃវ៉ាន់ កាន់តែខ្លាំងនោះ សមាជិកសភាសហរដ្ឋអាមេរិក កាលពីខែធ្នូ ឆ្នាំ២០២២ បានអនុម័តកញ្ចប់ចំណាយរបស់រដ្ឋាភិបាលក្រុងវ៉ាស៊ីនតោន កើនឡើង រហូតដល់ ១,៧ពាន់ពាន់លានដុល្លារអាមេរិក ដោយក្នុងនោះក៏បានអនុញ្ញាតឱ្យលក់អាវុធ រហូតដល់១០ពាន់លានដុល្លារអាមេរិក ទៅឱ្យកោះមួយនេះផងដែរ៕
