ឯកឧត្តម ស សុខា ៖ ចងចាំជានិច្ចចំពោះគុណបំណាច់គណបក្សប្រជាជនកម្ពុជា និងប្តេជ្ញាការពារស្មារតី ៧ មករា ជាអមតៈ
ភ្នំពេញ ៖ ឯកឧត្តម ស សុខា រដ្ឋលេខាធិការក្រសួងអប់រំ យុវជន និងកីឡា និងជាកូនប្រុសច្បងសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាអនុប្រធានគណបក្សប្រជាជនកម្ពុជា នៅព្រឹកថ្ងៃទី៧ ខែមករា ឆ្នាំ២០២២ បានបង្ហោះសារអបអរសាទរទិវាជ័យជំនះ ៧ មករា ខួបទី ៤៤ឆ្នាំ ដោយបង្ហាញពីការដឹងគុណ និងចងចាំជានិច្ចចំពោះគុណបំណាច់របស់សម្តេចទាំងបី ក៏ដូចជាគណបក្សប្រជាជនកម្ពុជា ក្នុងការលះបង់តស៊ូរំដោះប្រទេសជាតិ ពីរបបប្រល័យពូជសាសន៍ ប៉ុល ពត និងប្តេជ្ញាថែរក្សា ការពារស្មារតី ៧ មករា ជាអមតៈ ផងដែរ ។
ខាងក្រោមនេះជាខ្លឹមសារទាំងស្រុងរបស់ឯកឧត្តម ស សុខា ដែលបានបង្ហោះក្នុងផេកផ្លូវការរបស់ខ្លួន ៖
[ថ្ងៃនេះគឺជាខួបទី៤៤ នៃទិវាជ័យជម្នះ ៧ មករា ( ៧ មករា ១៩៧៩ - ៧ មករា ២០២៣ ) ដែលប្រជាជនកម្ពុជាយើងទូទាំងប្រទេស និងក្រៅប្រទេសផងដែរ នាំគ្នាប្រារព្ធពិធីរម្លឹកខួប និងអបអរសាទរយ៉ាងខ្ញៀវខ្ញាចំពោះទិវាប្រវត្តិសាស្ត្រមិនអាចបំភ្លេចបានរបស់កម្ពុជា ។
ថ្ងៃ ៧ មករា ១៩៧៩ ជាថ្ងៃកំណើតទី២ របស់ប្រជាជនកម្ពុជា ដែលបានរួចផុតជីវិតពីរបបប្រល័យពូជសាសន៍ ប៉ុល ពត ដោយសារការលះបង់សាច់ស្រស់ឈាមស្រស់ តស៊ូរំដោះជាតិ របស់សម្តេចទាំងបី គឺសម្តេចអគ្គមហាពញាចក្រី ហេង សំរិន សម្តេចអគ្គមហាធម្មពោធិសាល ជា ស៊ីម និងសម្តេចអគ្គមហាសេនាបតីតេជោ ហ៊ុន សែន ព្រមទាំងឥស្សរជនស្នេហាជាតិជាច្រើនរូបទៀត ដោយផ្តើមចេញពីថ្ងៃ ២ ធ្នូ ១៩៧៨ ។
ថ្ងៃ ២ ធ្នូ ១៩៧៨ ឥស្សរជនខ្មែរ ទាំង ៣ក្រុម ដែលដឹកនាំដោយសម្តេចទាំងបី ដោយមើលឃើញពីទុក្ខវេទនារបស់ប្រជាជនកម្ពុជា ត្រូវបង្ខំឲ្យធ្វើការលើសកម្លាំង បង្អត់បាយ បំបាត់សាសនា គ្មានសាលារៀន ពិសេសកាប់សម្លាប់យ៉ាងសាហាវព្រៃផ្សៃ ពីរបបប្រល័យពូជសាសន៍ ប៉ុល ពត ឥស្សរជនខ្មែរទាំង ៣ក្រុម បានសម្រេចចិត្តចូលព្រៃតស៊ូ ដើម្បីរំដោះប្រជាជន និងប្រទេសជាតិទាំងមូល ។
ការតស៊ូដោយយកសាច់ស្រស់ឈាមស្រស់ ជាដើមទុន របស់សម្តេចទាំងបី និងឥស្សរជនខ្មែរ ទីបំផុតទទួលបានជ័យជម្នះលើរបបប្រល័យពូជសាសន៍ ប៉ុល ពត នាថ្ងៃ ៧ មករា ១៩៧៩ ។
ក្រោយថ្ងៃរំដោះ ៧ មករា ៧៩ កម្ពុជាត្រូវខ្ទេចខ្ទីគ្មានសល់ ហេដ្ឋារចនាសម្ព័ន្ធនានាស្ទើក្លាយជាផេះ ប៉ុន្តែកម្ពុជាក្រោមការដឹកនាំរបស់គណបក្សប្រជាជនកម្ពុជា ដែលមានសម្តេចទាំងបី ជាប្រមុខ ដោយផ្តើមពីបាតដៃទទេ បានកសាងអភិវឌ្ឍន៍ប្រទេសជាតិ រីកចម្រើន និងមានអ្វីៗគ្រប់បែបយ៉ាងដូចសព្វថ្ងៃ ព្រមទាំងនាំមកនូវសុខសន្តិភាពពេញបរិបូរណ៍ជូនប្រជាជន និងជាតិមាតុភូមិនៃយើង ។
គុណបំណាច់ដ៏ថ្លៃថ្លារបស់គណបក្សប្រជាជនកម្ពុជា ពិតជាមិនអាចកាត់ថ្លៃបាន សម្រាប់ប្រជាជន និងប្រទេសជាតិទាំងមូល ដែលត្រូវចងចាំក្នុងក្រអៅបេះដូងជានិច្ចនិរន្តរ៍តរៀងទៅ ។
ក្នុងនាមកូនខ្មែរជំនាន់ក្រោយមួយរូប សូមអបអរសាទរ និងចងចាំជានិច្ចចំពោះគុណបំណាច់ នៃការលះបង់សាច់ស្រស់ឈាមស្រស់ ក្នុងបុព្វហេតុតស៊ូរំដោះជាតិមាតុភូមិ របស់សម្តេចទាំងបី ព្រមទាំងឥស្សរជនស្នេហាជាតិទាំងអស់ ពិសេសគណបក្សប្រជាជនកម្ពុជា និងសូមប្តេជ្ញា ថែរក្សា ការពារស្មារតី ៧ មករា ជាអមតៈ]៕
