ប្រជាពលរដ្ឋស្នើរសុំឲ្យអាជ្ញាធរចាត់វិធានការចំពោះក្រុមអ្នករកស៊ីដឹកឈើអាណាធិបតេយ្យនៅតាមដងផ្លូវសាធារណៈ
ក្រចេះ: ថ្មីៗនេះប្រជាពលរដ្ឋអ្នកលក់ដូរតាមដងផ្លូវ នៅស្រុកស្នួល និងប្រជាពលរដ្ឋធ្វើដំណើរតាមដងផ្លូវបានធ្វើការរិះគន់ចំពោះក្រុមអ្នករកស៊ីជញ្ជូនឈើតាមរថយន្តសំយុងកែច្នៃគ្រប់ប្រភេទ ការបើកបរយ៉ាងអាណាធិបតេយ្យនៅតាមដងផ្លូវសាធារណៈជារៀងរាល់យប់ ។
ជាក់ស្ដែង សកម្មភាពក្រុមអ្នកបើកបរដឹកជញ្ជូនឈើយ៉ាងអនាធិបតេយ្យនេះ ត្រូវបានគេសង្កេតឃើញថា ស្ងប់ស្ងាត់បានមួយរយៈពេល។ បន្ទាប់ពីកម្លាំងជម្រុះដឹកនាំដោយឯកឧត្ដម គង់ គីមនី អភិបាលរងខេត្តក្រចេះ ក៏បានចុះពង្រឹងសន្ដិសុខសណ្ដាប់ធ្នាប់រយៈពេល២ថ្ងៃ ទៅ៣ថ្ងៃ នៅស្រុកស្នួល។ ក្រោយពីកម្លាំងចម្រុះដកវិញ គេសង្កេតឃើញថា សកម្មភាពរបស់ក្រុមដឹកជញ្ជូនឈើអនាធិបតេយ្យ បានធ្វើសកម្មភាពជាថ្មី ដោយបើកបរជាក្បូន បញ្រ្ចាសទិសមិនដឹងឆ្វេងស្ដាំ បិទមធ្យោបាយធ្វើដំណើររបស់ប្រជាពលរដ្ឋ តាមផ្លូវមិនអោយវ៉ាជែង ។
ប្រជាពលរដ្ឋ បានធ្វើការស្នើរសុំឲ្យអាជ្ញាធរ មានសមត្ថកិច្ច ចាត់វិធានការចំពោះក្រុមអ្នករកស៊ីដឹកឈើទាំងនោះអោយម៉ឺងម៉ាត់ ដោយពលរដ្ឋព្រួយបារម្ភអំពីសុខសុវត្ថិភាពក្នុងការធ្វើដំណើរ និងការរស់នៅជាដើម ។ ឈើទាំងនោះ ត្រូវបានគេដឹកជញ្ជូនចេញមកពីខាងស្រុកកែវសីមា និងមួយចំនួនចេញពីខាងតំបន់ភូមិសាស្ត្រឃុំក្រញូងសែនជ័យ ហើយខ្លះទៀតចេញមកពីតាមច្រកសំពោចស្រែរនាមឆ្លងកាត់ស្រុកស្នួល ឆ្ពោះទៅកាន់ស្រុកមេមត់ ខេត្តត្បូងឃ្មុំ ។
គូសបញ្ជាក់ថា ជាមួយនឹងសកម្មភាពរបស់ក្រុមអ្នករកស៊ីឈើខាងលើ គឺបើកបរក្នុងល្បឿនលឿនតែងតែបង្កគ្រោះថ្នាក់ចរាចរណ៍ជាងញឹកញាប់ ។ ម្យ៉ាងវីញទៀត រថយន្តដឹកឈើទាំងនោះ គឺមិនមានបំពាក់ភ្លើង ឬស្លាកសញ្ញាអោយបានត្រឹមត្រូវទៅតាមបច្ចេកទេស មន្ត្រីនគរបាលជំនាញឡើយ ហើយក៏គ្មានមន្ត្រីជំនាញពាក់ព័ន្ធណាម្នាក់ ទុបស្កាត់ បង្ក្រាប ឬមានវិធានការ ទៅលើក្រុមអ្នកបើកបររថយន្តនោះដែរ ៕
រាយការណ៏ដោយ លោក គិន ឆន សហការីប្រចាំខេត្តក្រចេះ
