សមាគមសម្ព័ន្ធសារព័ត៌មានឯករាជ្យ អំពាវនាវឲ្យចូលរួមទប់ស្កាត់ភាពមិនប្រក្រតីក្នុងទិវានៃក្តីស្រលាញ់ ១៤កុម្ភៈ
ភ្នំពេញ ៖ នៅរសៀលថ្ងៃទី១០ ខែកុម្ភៈ ឆ្នាំ២០២៣ នេះ សមាគមសម្ព័ន្ធសារព័ត៌មានឯករាជ្យ បានចេញសេចក្តីអំពាវនាវដល់ថ្នាក់ដឹកនាំ សមាជិក សមាជិកា និងអង្គភាពសារព័ត៌មានជាសមាជិកសមាគមសម្ព័ន្ធសារព័ត៌មានឯករាជ្យ ក៏ដូចជាយុវជន យុវនារី សិស្ស និស្សិតទាំងអស់ ចូលរួមទប់ស្កាត់សកម្មភាពមិនប្រក្រតីក្នុងទិវានៃក្តីស្រលាញ់ ១៤ កុម្ភៈ ដែលមានខ្លឹមសារដូចខាងក្រោម ៖
សមាគមសម្ព័ន្ធសារព័ត៌មានឯករាជ្យ បានសង្កេតឃើញថា យុវជន យុវនារី សិស្ស និស្សិតមួយចំនួនតូច មានការយល់ច្រឡំថាថ្ងៃទី១៤ កុម្ភៈ ជាថ្ងៃបុណ្យសង្សារ ឬជាថ្ងៃផ្តើមសេចក្តីស្នេហា ឬជាថ្ងៃណាត់ជួបគ្នារវាងគូស្នេហ៍ ។ តាមពិតទិវានេះ ពុំមែនជាប្រពៃណីរបស់ជនជាតិខ្មែរយើងទេ ប៉ុន្តែយុវជន យុវនារី សិស្ស និស្សិតមួយចំនួនតូច បានភ្លើតភ្លើន ភ្លេចការសិក្សា បាត់បង់សេចក្តីថ្លៃថ្នូរទាំងបុគ្គលផ្ទាល់ និងក្រុមគ្រួសារ ប្រាសចាកវប្បធម៌ និងប្រពៃណីជាតិខ្មែរដ៏ផូរផង់។
ដើម្បីទប់ស្កាត់នូវសកម្មភាពមិនប្រក្រតីទាំងនេះ សមាគមសម្ព័ន្ធសារព័ត៌មានឯករាជ្យ ស្នើដល់ថ្នាក់ដឹកនាំ និងសមាជិក សមាជិកា ព្រមទាំងចាងហ្វាងសារព័ត៌មានជាសមាជិកសមាគមសម្ព័ន្ធសារព័ត៌មានឯករាជ្យ យុវជន យុវនារី សិស្ស និស្សិតទាំងអស់ ដូចខាងក្រោម ៖
១. សូមធ្វើការផ្សព្វផ្សាយឱ្យបានទូលំទូលាយ ដោយផ្ទាល់ តាមសារព័ត៌មាន និងបណ្តាញផ្សព្វផ្សាយសង្គមនានា ដោយភ្ជាប់នូវខ្លឹមសារពន្យល់ ណែនាំ អប់រំ កុំឱ្យមានការយល់ខុសអំពីអត្ថន័យទិវានៃក្តីស្រលាញ់។
២. សូមអំពាវនាវដល់យុវជន យុវនារី សិស្ស និស្សិតទាំងអស់ កុំមានការយល់ច្រឡំ ប្រព្រឹត្តនាំឱ្យមានវិប្បដិសារីដល់ខ្លួនឯង និងក្រុមគ្រួសារ ដោយសារការគិតខុសមួយពេល។
សមាគមសម្ព័ន្ធសារព័ត៌មានឯករាជ្យ សង្ឃឹមថា ថ្នាក់ដឹកនាំ សមាជិក សមាជិកា អង្គភាពសារព័ត៌មានជាសមាជិក ក៏ដូចជាយុវជន យុវនារី សិស្ស និស្សិត នឹងចូលរួមទាំងអស់គ្នាកុំបីខាន៕
