អគ្គិភ័យឆេះបំផ្លាញផ្ទះប្រជាពលរដ្ឋអស់២៧ខ្នង នៅសង្កាត់ផ្សារឆ្នាំង ក្រុងកំពង់ឆ្នាំង ផ្តើមចេញពីរោងឆ្អើរត្រី
កំពង់ឆ្នាំង ៖ ផ្តើមចេញពីការឆ្អើរត្រីខ្វះការប្រុងប្រយ័ត្ន បានបង្ករឲ្យមានអគ្គិភ័យ ឆាបឆេះផ្ទះប្រជាពលរដ្ឋអស់ចំនួន២៧ខ្នង នៅក្នុងសង្កាត់ផ្សារឆ្នាំង ក្រុងកំពង់ឆ្នាំង ។ ហេតុការណ៍គ្រោះអគ្គិភ័យនេះ បានកើតឡើងនៅវេលាម៉ោង៧និង៣០នាទីព្រឹកថ្ងៃទី១២ ខែមិនា ឆ្នាំ២០២៣ ។
លោកឧត្តមសេនីយ៍ត្រី អៀរ ប៊ុនធឿន ស្នងការរង និងជាអ្នកនាំពាក្យស្នងការដ្ឋាននគរបាលខេត្តកំពង់ឆ្នាំង បានឲ្យដឹងថា នៅក្នុងហេតុការណ៍គ្រោះអគ្គិភ័យនេះ មានរថយន្តពន្លត់អគ្គិភ័យចំនួន១០គ្រឿង របស់ស្នងការដ្ឋាន បានចេញអន្តរាគមន៍ បាញ់ទឹកពន្លត់ ។លោក អៀរ ប៊ុនធឿន បានឲ្យដឹងទៀតថា អគ្គិភ័យនេះ បានឆេះបំផ្លាញផ្ទះប្រជាពលរដ្ឋអស់ចំនួន២៧ខ្នង ។
ចំពោះមូលហេតុគឺផ្តើមចេញពីរោងឆ្អើរត្រី ។នៅក្នុងហេតុការណ៍គ្រោះអគ្គិភ័យនេះ គេឃើញវត្តមាន លោកជំទាវ កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង ឯកឧត្តម ស៊ុន សុវណ្ណារិទ្ធិ អភិបាលខេត្ត ឯកឧត្តម គុយ ចន្ថា សមាជិកក្រុមប្រឹក្សាខេត្ត ឯកឧត្តម ស្រ៊ន សំឬទ្ធី ឯកឧត្តម សាន់ យូ អភិបាលរងខេត្ត លោកឧត្តមសេនីយ៍ទោ ខូវ លី ស្នងការនគរបាលខេត្ត រួមនឹងមន្ត្រីជាច្រើនទៀត ក្នុងការដឹកនាំចុះជូយអន្តរាគមន៍ ៕
