ពិធីប្រកាសសុពលភាពសមាជិកក្រុមប្រឹក្សាឃុំជ្រោយស្វាយ នៃស្រុកស្រែអំបិល ក្រោមអធិបតីភាពដ៏ខ្ពង់ខ្ពស់ លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង
ថ្ងៃព្រហស្បតិ៍ ៩កើត ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៧ ខែកក្កដា ឆ្នាំ២០២២ ព្រឹកថ្ងៃ ពុធ ៨កើត ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី ០៦ ខែកក្កដា ឆ្នាំ២០២២ នៅសាលាឃុំជ្រោយស្វាយ បានរៀបចំពិធី ប្រកាសសុពលភាពសមាជិកក្រុមប្រឹក្សាឃុំជ្រោយស្វាយ អាណត្តិទី ៥ ក្រោមអធិបតីភាពដ៏ខ្ពង់ខ្ពស់ លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង ។
ក្នុងនោះផងដែលក៏មានការចូលរួមពី លោក ម៉ាស់ សុជា ប្រធានក្រុមប្រឹក្សាស្រុកស្រែអំបិល លោក ជា ច័ន្ទកញ្ញា អភិបាល នៃគណៈអភិបាលស្រុក និង លោក លោកស្រី សមាជិកក្រុមប្រឹក្សាស្រុកទទួលបន្ទុកឃុំ អភិបាលរងទទួលបន្ទុកឃុំ ប្រធានការិយាល័យអង្គភាពជុំវិញស្រុក នាយករងរដ្ឋបាលសាលាខេត្ត ស្នងការនគរបាលខេត្ត ក្រុមប្រឹក្សាឃុំ មេភូមិ តំណាងគណបក្សនយោបាយ និងប្រជាពលរដ្ឋ ដែលប្រព្រឹត្តទៅនៅសាលាឃុំជ្រោយស្វាយ ស្រុកស្រែអំបិល ខេត្តកោះកុង។ ។
ឆ្លៀតក្នុងឪកាសនោះ លោកជំទាវ បានសំដែងនូវការចូលរួមអបអរសាទរ ចំពោះ សមាសភាពក្រុមប្រឹក្សាឃុំ ក្នុងអាណត្ដិទី៥ និងជំទប់ទី១ ជំទប់ទី២ ទាំងអស់ ដែលបានទទួល នូវការទំនុកចិត្ត ពីសំណាក់ប្រជាពលរដ្ឋ តាមរយៈការបោះឆ្នោតជ្រើសរើសក្រុមប្រឹក្សាឃុំ សង្កាត់ កាលពីថ្ងៃអាទិត្យ ទី៥ ខែមិថុនា ឆ្នាំ២០២២ កន្លងមក ដែលបានប្រព្រឹត្តទៅប្រកប ដោយលក្ខណៈសេរី ត្រឹមត្រូវ និងយុត្ដិធម៌ ។
លោកជំទាវ បានមានប្រសាសន៍បន្តរថាៈ ក្រុមប្រឹក្សាឃុំថ្មី អាណត្តិទី៥ ឆ្នាំ២០២២នេះ ត្រូវបន្តអនុវត្តលិខិតបទដ្ឋាននានា ដែលនៅជាធរមាន និងបន្តការងារដែលនៅសេសសល់ ពីអាណត្តិមុន ដោយក្រុមប្រឹក្សាថ្មី ត្រូវរក្សាឲ្យបាននូវវប្បធម៌ សាមគ្គីភាព សម្របសម្រួល កុំបែងចែកនិន្នាការនយោបាយ ហើយបំរើប្រជាពលរដ្ឋ ឲ្យបានប្រសើរឡើង បង្កើនទំនាក់ទំនង រវាងមន្ត្រី-មេឃុំ ឲ្យបានល្អ និងស្គាល់ពីសុខទុក្ខប្រជាពលរដ្ឋដើម្បីលើកកម្ពស់ការចូលរួម បំពេញការងារជាក្រុម របស់ក្រុមប្រឹក្សាទាំងអស់ តាមរយៈការដកពិសោធន៍ ពីគ្នាទៅវិញ ទៅមក។
ជាចុងបញ្ចប់ លោកជំទាវបានផ្តាំផ្ញើរថា ត្រូវបន្ដអនុវត្ដការងារគ្រប់គ្រង និងការអភិវឌ្ឍមូលដ្ឋាន ពីក្រុមប្រឹក្សាឃុំ សង្កាត់ អាណត្ដិចាស់ សំដៅធានាឲ្យមាននិរន្ដរភាព ក្នុងកិច្ចការរដ្ឋបាល និងការផ្ដល់សេវា ព្រមទាំងការអភិវឌ្ឍនៅមូលដ្ឋាន ឲ្យកាន់តែមានប្រសិទ្ធភាពថែមទៀត ដើម្បីឆ្លើយតប ទៅនឹងតម្រូវការរបស់ប្រជាពលរដ្ឋ លើសេវាសាធារណៈ ឱ្យបានកាន់តែរហ័ស និងធ្វើការ សម្របសម្រួល លើបញ្ហាផ្សេងៗ ឱ្យមានតម្លាភាព ។ ត្រូវខិតខំលុបបំបាត់ នូវល្បែងស៊ីសង និងបទល្មើសផ្សេងៗ ដែលកើតមាន ក្នុងមូលដ្ឋានរបស់ខ្លួន និងអនុវត្តន៍ឱ្យមានប្រសិទ្ធភាព នូវគោលនយោបាយភូមិ ឃុំ មានសុវត្ថិភាព ៕