សមាគមសហប្រតិបត្តិការអ្នកវិនិយោគអចលនទ្រព្យផ្តល់ដីចំនួន ៥០ ឡូតិ៍ ជូនដល់ប្រជាពលរដ្ឋដែលមានជីវភាពខ្វះខាតគ្រប់បណ្តាខេត្ត ក្រុង
នៅព្រឹកថ្ងៃអាទិត្យ ៤រោច ខែអាសាឍ ឆ្នាំខាល ចត្វាស័ក ព.ស ២៥៦៦ ត្រូវនិងថ្ងៃទី ១៧ ខែកក្កដា ឆ្នាំ២០២២ សមាគមសហប្រតិបត្តិការអ្នកវិនិយោគអចលនទ្រព្យមានកម្មវិធីផ្តល់ដីចំនួន ៥០ ឡូតិ៍ ជូនដល់ប្រជាពលរដ្ឋដែលមានជីវភាពខ្វះខាតតាមគ្រប់បណ្តាខេត្ត ក្រុង ដែលមានទីតាំងដីឡូតិ៍ស្ថិតនៅភូមិ អន្សារចំបក់ ឃុំស្វាយស ស្រុកក្រគរ ខេត្តពោធិសាត់។
ឯកឧត្តម ដួង ច័ន្ទអម្រិត ប្រធានសមាគមសហប្រតិបត្តិការអ្នកវិនិយោគអចលនទ្រព្យបានមានប្រសាសន៏ថាសមាគមមានកម្មវិធីផ្តល់ដីជូនប្រជាពលរដ្ឋដែលមានជីវភាពខ្វះខាតគឺដើម្បីចូលរួមលើកស្ទួយកម្រិតជីវភាពប្រជាពលរដ្ឋ និងកៀរគរធនធានមនុស្ស ដើម្បីជួយដល់ការបង្កើតតំបន់ឧស្សាហកម្ម និងពង្រីកតំបន់សេដ្ឋកិច្ចថ្មី ជាពិសេសដើម្បីទាក់ទាញអ្នកវិនិយោគទុនបរទេស ក្រោមគោលនយោបាយរបស់រាជរដ្ឋាភិបាល តាម យុទ្ធសាស្ត្រ ចតុកោណ ដើម្បី កំណើន សមធម៌ និង ប្រសិទ្ធភាព ជាពិសេស ស្រុកក្រគរនេះគឺជាតំបន់ដែលមានការយកចិត្តទុកដាក់ពីរាជរដ្ឋាភិបាលយ៉ាងខ្លាំង ដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន ។
ឯកឧត្តមបានបញ្ជាក់ផងដែលថាសមាគមសហប្រតិបត្តិការអ្នកវិនិយោគអចលនទ្រព្យផ្តល់ដីជូនដល់ប្រជាពលរដ្ឋដែលមានជីវភាពខ្វះខាត គ្រប់បណ្តាខេត្ត ក្រុង ចំនួន២លើករួចមកហើយ ។
ឯកឧត្តមបានបន្តរទៀតថា នៅក្នុងទំនៀមទម្លាប់ប្រពៃណីខ្មែរកាលពីជំនាន់មុនៗ តមកដល់បច្ចុប្បន្ន គឺ វប្បធម៌ នៃ ការចែករំលែក ដើម្បីជួយគ្នាទៅវិញទៅ មកគឺមានតម្លៃ ធំធេង និងការ ស្រឡាញ់ រាប់អាន គ្នាជាបងជាប្អូន ជាជាតិសាសន៍ តែមួយនោះ ក្នុងនាម ឯកឧត្តមជាកូនខ្មែរមួយរូបពេញចិត្តបើកបេះដូងទូលំទូលាយចូលរួមនៃវប្បធម៌ចែករំលែក ក្រោមពាក្យមួយឃ្លាថា អ្នកមានច្រើនជួយអ្នកមានតិច និងអ្នកមានតិច ជួយអ្នកអត់មាន ។
ជាចុងក្រោយឯកឧត្តម ប្តេជ្ញាចិត្ត និងខិតខំ យកចិត្តទុកដាក់ បំពេញភារកិច្ចដោយស្មារតីទទួលខុសត្រូវខ្ពស់ដើម្បីសម្រេចបានជោគជ័យថ្មីៗថែមទៀតជូនបងប្អូនប្រជាពលរដ្ឋក្នុងតំបន់នោះ ៕
